本文重點
香港汽車會會長雲維熹（Wesley）出身顯赫，佢係成吉思汗嘅第二十九代傳人，父親雲大棉係知名嘅前全國政協委員，所以無論品味同氣勢簡直係與生俱來。佢原本幫襯咗Armani成二十幾年，但係近年卻戀上法國嘅新歡。
卓妮上星期喺酒會度撞到好耐冇見嘅Wesley，依然官仔骨骨，但估唔到着到佢腰板筆直嘅西裝竟然係冇牌子喎！
冇牌老西質地正
佢話間舖頭位於法國巴黎香榭麗舍大道上，有次佢行過入去逛吓，發覺啲西裝質地好正，一試就啱身，款式又啱心水，於是從此被俘虜。佢話間舖廠房設喺意大利，只要話畀佢哋知要咩料、咩色，就可以訂造。由於佢接咗國際汽車聯會（FIA）亞洲區主席之後，每兩、三個月就去一次法國，可以今次落柯打，下次去攞，都幾方便。
咁好服務同質素嘅老西，每套盛惠七千元。不過Wesley始終係Armani擁躉，對於Armani領呔至今仍然矢志不渝！
卓妮