港大民意網站喺上個星期用電話抽樣訪問咗超過一千名市民，其中政務司司長唐英年嘅民望評分，平均有五十五點四分，扣除誤差率其實同上個月相差無幾，但講到支持度就出現咗顯著嘅變化。
支持唐唐繼續出任政務司司長嘅受訪者比率有四成三，較上月下跌五個百分點，反對比率則有一成七，較上月升咗兩個百分點，即總計佢嘅淨支持度一共下跌咗七個百分點，喺三名司長之中表現最差。
調查冇分析到唐唐支持度下跌嘅原因，不過咁啱政制及內地事務局局長林瑞麟嘅支持度，亦喺同一時段內微跌咗三個百分點，估計兩人民望雙雙插水，多少都係同政改諮詢、以及喺調查進行前舉辦嘅元旦遊行同衝擊中聯辦事件有關。
睇番去年十月港府公布政改方案前，唐唐嘅支持度仲有成接近五成三，短短三個月內已合共跌咗十個百分點，再跌多兩、三個百分點，就會創下佢出任司長以來嘅新低。