田少牛一，家人空群出動慶祝，太太、女兒啟安、女婿、親家一家、兒子啟文同新抱，晚上齊齊去食日本菜，所以田少下午四點半入場睇比賽，七點幾睇到一半就要提早離開，希望佢睇到偶像、美洲女球手「大威」維納斯威廉絲出場啦，事關佢睇好大威會捧獎。身兼香港網球贊助人協會行政委員會成員嘅田少，已向政府建議，喺維園原地重建容納八千人嘅網球場，希望如願以償啦，到時香港就可以舉辦更加高質素網球賽嘞。

問到田少，有乜生日願望？佢話希望流感消退，經濟好番，打工仔有人工加，而本身係萬泰控股主席嘅田少以身作則，會為公司員工加薪，平均幅度仲肯定會高過通脹添，呢個相信亦係唔少萬泰員工嘅生日願望！