瑪麗醫院行政總監賴福明退休，醫院管理局最快呢個星期公布邊過坐佢個位，由衞生署借調過醫管局做質素及安全總監嘅衞生防護中心總監梁栢賢，曾經係大熱門，但原來佢決定留番喺醫管局，最終冇申請呢個位，唔知係咪醫管局主席胡定旭唔肯放人呢？
衞生署前晚與傳媒碰頭，梁栢賢都有去，佢話依家喺醫管局總部有一大堆嘢要做，病人滿意調查、醫院認證、病人電腦病歷、避免調錯病人同調錯屍嘅病人身份確認等等，連宣傳餵母乳都要佢做埋。
梁栢賢話如果佢過去瑪麗，醫管局會頭都痛埋，佢惟有留番喺總部幫手喎，總之就係捨我其誰喇。
瑪麗醫院行政總監同時身兼港島西醫院聯網總監，要做嘅嘢其實都唔少，聽聞有四個重量級人物爭奪呢個位，當中包括九龍東聯網總監陸志聰、新界西聯網總監盧志遠、瑪麗醫院副行政總監陳志權同埋葛量洪醫院行政總監李文豪，相信醫管局好快會揭盅。