香港科技大學以自創儀器檢測本港各區空氣污染水平，發現部分地區嘅污染數據，比環保署路邊監測站收集嘅數據高兩到三倍。點解會咁？講起嚟真係搞笑，原來環保署設定嘅空氣監測站「高高在上」，離路面足足五米咁高，比汽車廢氣喉同人嘅身高高出一大截，咁樣得出嚟嘅空氣污染數據又點會有譜呀。

就算中國籃球巨星姚明，身高都係七呎幾咋，馬路行緊嘅汽車，廢氣喉至多離地面幾呎，環保署將監測站放到十幾廿呎高，空氣污染梗係少好多啦，咁做除咗粉飾數據，誤導市民，仲有乜作用？環保署不如索性將監測站搬晒上山頂吖，笨！

港府口口聲聲要重見藍天白雲，但淨係得個噏字，除咗徵收膠袋稅乘機賺一筆、推行「停車熄匙」添煩添亂呢啲擾民措施之外，行之有效嘅措施一項都攞唔出。

家陣連反映本港空氣污染程度、作為制訂環保政策主要參考因素嘅數據都做埋手腳，同實際情況差咗一大截，路邊監測站形同虛設，得物無所用，呢種自欺欺人嘅做法，同玩篤數有乜分別？同弄虛作假有乜分別？

講開又講，弄虛作假呢家嘢，港府做慣做熟啦。仲記唔記得幾年前嗰單誘蚊產卵指數造假醜聞吖？負責滅蚊嘅食環署有職員利用向蚊杯噴蚊油、不時更換清水等手法干擾誘蚊產卵器，人為減低蚊患指數，唔少分區嘅指數喺盛夏雨季創出咗「零紀錄」。後來西洋鏡畀人拆穿，造假「佳績」畀人踢爆，令香港成為國際笑柄。

除咗自欺欺人，港府仲有一樣絕招就係瞞天過海。呢嗱，當局舊年承諾採納世衞組織新嘅「空氣質素指引」，取代沿用咗二十幾年、早就Out晒嘅「空氣質素指標」，結果畀環保組織踢爆，香港打算採納嘅所謂「最嚴格」指標，只不過係發展中國家採用嘅「中期指標」。港府搞環保究竟有冇誠意，連小學生都知道答案啦。

綠色生活早就成為世界潮流，環保標準愈來愈嚴，香港自稱「國際都會」，採用環保標準居然打晒倒褪，搞到香港烏煙瘴氣，喺國際社會眼中唔再係「宜居城市」。唔怪得有國際大機構頂唔順呢度嘅污濁空氣，急急遷走，甚至有外國政府因為香港空氣質素太差，向國民發出旅遊忠告。唉，煲呔曾變咗被通緝嘅「氣候逃犯」，真係羞家。

環保標準向低睇齊已經離晒譜，環保監測數據仲自欺欺人，更加係笑話中嘅笑話。一次又一次誤導市民，證明當局根本冇決心冇信心推動環保，改善空氣質素，試問港府仲要拖到幾時？