政情：陳文綺慧愛心轉贈賀年食物
前排有大批未開封嘅過期零食被發現棄置喺垃圾站，吸引唔少市民去到掃清光。早前我哋喺一個活動上見到東華三院前主席陳文綺慧，講起剛過完農曆新年，好多人都會收到大量賀禮，食唔晒又會變成過期食物，唔知佢會點處理呢？
盼獨居長者感窩心
陳文綺慧話，新年期間確實會收到好多新年禮物，當中大部分係食物，如果係生果嘅話，佢就一定會食晒唔好嘥，因為佢好鍾意食生果，所以如果朋友送嘅賀禮係水果，就啱晒心水喇！不過有啲賀禮好似朱古力、曲奇呢類禮盒，佢就食唔晒，如果真係太多就會轉送畀親友，或者交畀慈善機構轉贈長者。
佢話好多獨居長者喺過年時候未必有人關心，簡簡單單一盒賀禮，對佢哋嚟講雖然唔係必需品，但就絕對係一種心意，希望可以畀佢哋多一份溫暖窩心嘅感覺。