政情：葉劉「食葡萄」插爆三候選人
特首選戰進入最後直路，由兩男一女爭奪下屆行政長官寶座，恨做特首恨到出晒面嘅新民黨主席葉劉淑儀，連續兩屆拎唔夠提名票而無得入閘，悲痛同妒忌之情可想而知。尋日葉劉就將內心酸過葡萄嘅情緒化為彈藥，輪流炮轟三位候選人，先斥林鄭月娥態度不誠懇，又質疑曾俊華無魄力，再直指胡國興管理經驗唔夠，嗰陣酸溜溜嘅氣場完全湧晒出嚟。
爭提名已頻放暗箭
雖然流行歌曲都有教「不要去羨慕，不要去妒忌」，但係葉劉淑儀由上屆起已劍指特首寶座，五年磨一劍後今屆再次挑戰，卻依然連入閘機會都欠奉。反而佢仲喺官場期間嘅兩位下屬林鄭月娥同埋曾俊華，甚至係突然冒出嘅前法官胡國興都成功入閘，話佢無妒忌就肯定係呃人。因妒成恨，爭取入閘時已經頻頻放暗箭攻擊對手嘅葉劉淑儀，喺闖閘失敗後更無所顧慮，尋日明刀明槍插爆三位特首候選人。
葉劉先炮轟曾被佢稱為「妹妹」嘅林鄭，指佢雖然係唯一得到中央支持嘅候選人，但係選舉工程膚淺，態度不夠誠懇，未有喺政綱承擔推動政改同基本法廿三條立法，結果係中央支持力度愈大，受到嘅攻擊愈多，令人覺得係假選舉咁話。
之後佢轉移火力，話曾俊華雖然係「好好先生」，但係佢工作無魄力，就任財政司司長期間解決唔到土地供應不足同經濟增長放緩等問題，毫不留情話就算對方做到特首，亦只會「溫水煮蛙」，改變唔到局面。至於胡國興，葉劉話對方管理經驗唔夠，睇死對方推唔郁班公務員喎！
曾俊華忍唔住反擊
面對葉劉淑儀嘅抨擊，曾俊華忍唔住反擊，話自己當年出任海關關長期間，作為上司嘅葉劉對佢評分好高，唔明點解葉劉話佢無魄力，至於林鄭月娥同胡國興就未有回應。其實妒忌情緒同葡萄一樣，太多對身體都係有害無益，未知葉劉今次一吐「酸」氣後，可唔可以稍為紓緩佢嘅心酸之情呢？畢竟「誰都心酸過，那個沒有」……