香港菁英會成功爭取下月七日喺灣仔會展舉辦首次博鰲青年論壇，除咗博鰲亞洲論壇秘書長龍永圖坐鎮外，全國人大外事委員會主任委員、前外長李肇星都有份演講，預計有逾千人參加。由於不容有失，菁英會上下傾盡全力搞好今次論壇，主席施榮忻（Jaime）更將自己十二月一日生日會提前慶祝，佢班兄弟帶備靚酒，仲買埋張單，認真唔話得！
兄弟班鯉魚門歎海鮮
卓妮上周六（廿一日）晚到鯉魚門食海鮮，途經威龍海鮮酒家門口時，赫然發現Jaime留名訂枱，原來金利來集團行政總裁曾智明（Ricky）、莊士集團太子爺莊家彬（Albert）、立法會議員梁君彥公子梁宏正（Clarence）、燕之家創辦人白富鴻等一班兄弟擺海鮮宴慶祝Jaime生日，好多都帶埋禮物去，Ricky就喺屋企攞咗支九三年Dom Perignon法國香檳做賀禮，反而Albert只係帶咗兩梳蕉，原來佢係負責埋單找數嗰個。
唔揸車飲五公升紅酒
其實呢班兄弟都算唔話得，事關各有各忙，好似經常穿梭中港處理業務嘅Ricky，早排就到北京參加和統會活動，接着又去哈爾濱視察業務，咁忙都趕返港同Jaime慶祝生日，好有兄弟情。
為答謝一班兄弟嘅厚愛，Jaime喺自己間老佛爺酒莊攞咗兩支紅酒同兄弟分享，一支係五公升嘅1957年法國Chateau Gruaud-Larose紅酒，另一支係2003年Domaine du Grand Tinel Alexis Establet。Chateau Gruaud-Larose產自法國波爾多Saint Julien酒區，品質穩定，Jaime即場開咗支酒，同班兄弟一邊碰杯一邊歎海鮮，個個食到舔舔脷。
卓妮睇過當晚菜單相當豐富，有吉列黃皮老虎斑兩味，配酸甜汁及粟米汁，仲有椒鹽瀨尿蝦、貴妃蚌、螺片刺身等，當然仲有出晒名嘅「富哥炒飯」啦！班兄弟預咗暢飲一番，所以當晚好多都無揸車，搵司機負責接送，做個好市民。
講番博鰲青年論壇，今次嘅主題為「金融危機下的中國外交、經濟與文化」，身兼論壇籌委會顧問嘅Jaime將於下周二舉行論壇午餐簡介會，屆時會聯同籌委會主席、新世界發展執行董事鄭志剛及霍啟剛一齊出席接待傳媒高層，又係呢班富豪二代顯功架嘅時候！
卓妮