中環出更:百仁基金換班 李文俊接莊

由富二代組成嘅百仁基金尋晚喺中環四季酒店舉行就職禮,施榮忻(Jaime)正式卸任主席,由理文造紙太子爺李文俊(Raymond)接莊,特首梁振英到場主禮。Raymond甫上任即透露鴻圖大計,頭炮係捐一千萬元畀基金,大搞青年發展計劃,期望集合各成員嘅力量「以青年人影響青年人」,協助時下年輕人提升社會競爭力。

李剛捐出畫作拍賣

Raymond榮升主席,爸爸李運強、媽咪同太太黃敏儀齊現身支持,佢更加拉埋弟弟李文斌入會做副主席,實行兄弟同心拍住上。曾經做過仁濟醫院董事局主席嘅Raymond,做慈善工作經驗豐富,佢話有見青年失業率高達百分之十,當務之急係幫佢哋自我增值,促進就業。佢鼓勵年輕人踴躍提交計劃書,計劃審批後,基金將會撥款資助。

Jaime笑言,過去五年喺基金同菁英會內埋首青年工作,現時終於鬆一口氣。雖然過程辛苦,但佢坦言獲益良多,學懂處理不同問題嘅技巧,最開心係結識到一班來自五湖四海嘅朋友。嚟緊農曆新年,Jaime打算舉家飛澳洲墨爾本一周,度假兼享家庭樂。

今屆副主席出現唔少新面孔,好似中華廠商聯合會副會長顏吳餘英嘅公子顏志永、仁濟總理吳國榮、利記集團太子爺陳稼晉等,為基金帶來新氣象。顏志永話,未來基金活動一籮籮,為青年灌輸正能量。宴會上,副主席陳寧寧贊助十萬元畀Raymond開金口獻唱英文金曲,氣氛好熱鬧。調任澳門中聯辦副主任嘅李剛,捐出兩個月前親手繪畫嘅青竹墨寶予百仁基金拍賣,最終被Raymond以五十萬元投得。

卓妮

第一手消息請下載on.cc東方互動iPhone/iPad/Android/Windows Phone Apps