為咗推銷煲呔曾份無糖施政報告，政府尋日下午為傳媒高層及時事評論員搞咗幾場吹風會，除咗同大家解釋報告內容，仲畀個機會班副局長出嚟Show off吓，變相考驗大家熟唔熟書。除咗要喺吹風會上答問題，尋日教育局副局長陳維安（Kenneth）仲要頻頻趕場，吹風會完咗之後即刻趕去有線電視做直播訪問。
個訪問差唔多成十五分鐘，九成時間都係Kenneth喺度講，主要係解答記者對施政報告內有關教育政策嘅提問，包括點樣運用何文田及黃竹坑嘅地皮做私立大學，以至如何吸引內地學生來港讀書等等。第一次上電視做直播嘅Kenneth好淡定，全程侃侃而談無口窒，十幾分鐘內無睇過稿，似乎仲流暢過煲呔曾對稿讀施政報告，睇嚟做足功課。教育範疇都係煲呔曾硬銷嘅六大產業之一，Kenneth赤膊上陣做直播，莫非要同女主播搶飯食？
不過，做主播始終唔係Kenneth嘅專業，難怪尋日都有啲瑕疵出現，好似佢條呔歪咗啲，又唔知係咪尋日太早起身無剃鬚、定係鬚根長得快，所以上鏡特別礙眼！