濫藥問題成都市炸彈，玩具大王蔡志明都話關注，尋日出錢又出力，拉埋公子蔡加讚贊助喺九龍灣MegaBox舉行嘅抗毒活動。加讚坦言留學美國時亦曾遇上「隊草」的誘惑，但佢堅決Say No。佢又教路話，年輕人面對毒品，應大膽講出「我唔鍾意」四個字。
廿歲出頭嘅加讚原來係美國南加州大學政治系畢業生，但係佢無意投身政壇，近兩年返港後，都係幫爸爸打理家族玩具生意，成為爸爸嘅得力助手。講起外國吸食大麻及濫藥風氣盛行，加讚話，誘惑無處不在，但自己意志堅定，更唔認同拒絕「隊草」係老土，笑言如果朋友再三逼佢，會連朋友都無得做。加讚咁有主見，難怪蔡志明拍心口話好放心。
講番個活動，查實係由香港專業人士協會首席會長梁振英（CY）做搞手，蔡生咁撐CY，令人有無限聯想。到底兩人有乜淵源？蔡生話，早喺CY創立香港專業人士協會時，佢已加入做名譽會長，呢次出錢贊助活動只為做善事喎。