受廣深港高速鐵路工程影響嘅石崗菜園村村民，企硬不遷不拆，早前透過鄉議局邀請運輸及房屋局局長鄭汝樺（Eva）再落村交代事件，仲話煲定百花蛇舌草畀Eva清熱解毒。Eva啱啱去完北海道度假返嚟後，尋日佢出席新界社團聯會時，話返港後已即時聯絡菜園村代表，相約今個月內再落村拆彈，但據聞Eva只會解釋搬遷嘅需要，但村民最關心嘅搬遷及賠償安排，就要按既定程序處理。
至於日前傳出政府有意物色八鄉七星崗村土地，畀菜園村村民延續農耕生活，傳聞是真是假仍有待查證。不過，鄉議局主席劉皇發尋日出席同一場合時就話，七星崗村土地涉及私人業權，即使菜園村村民願意搬到該地定居，都要向相關業權人購買土地業權。發叔又話，要菜園村村民搬遷，講嚟講去都係賠償問題，即係一個字講晒：「錢！」
講開政府發展基建涉及嘅收地賠償問題，有鄉紳就話，賠償永遠最實際，差在賠多定賠少嘅啫，但千祈唔好收農地賠番笪農地，唔係實瘀爆，事關依家仲有幾多人耕田吖！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |