唔知大家點諗，功夫茶愈來愈覺得唔對路。東亞運出師未捷，運動場問題多多，籌備過程非常蝦碌，今年十二月賽事舉行期間好可能係香港「揚羞國際」嘅黃金機會。

唔講大家可能唔知，將軍澳運動場係香港唯一符合國際標準嘅田徑場地，建造費高達三億九千萬，今年五月開張啟用。之不過咁，符合國際標準唔代表擁有一流表現，正如你有資格參加國際賽事，唔代表你係一流選手。舉個例子吖，二○○二年中國足球隊有資格進軍世界盃，卒之做咗「三零部隊」，零得勝，零得分，零得球，莫講話唔係一流，想做三流都未夠班。

將軍澳運動場有乜問題？首先，常設座位居然只有少得可憐嘅三千五百個，加埋臨時座位先至勉強湊夠五千個，所以呢個所謂主要比賽場地冇辦法舉行東亞運開幕式同閉幕式。試諗諗，○八北京奧運如果唔可以喺鳥巢舉行開幕式同埋閉幕式，你會唔會覺得係天大笑話？

其次咯喎，將軍澳運動場嘅硬件設施真係不敢恭維，除咗有拱起現象之外，跑道其實仲有積水問題。你知啦，天雨路滑容易跣腳，凹凸不平容易躀低，萬一畀你跣到攤攤腰嗰個係有望來港獻技嘅國寶劉翔，負責統籌嘅康文署簡直係國家罪人！

即使康文署趕得切消滅跑道積水同埋拱起現象，始終解決唔到將軍澳運動場另外三個先天缺陷。第一，冇遮冇掩，非常大風，運動員有可能逆風比賽，妨礙造出理想成績。第二，鄰近環保大道，噪音之高，非同凡響，運動員能唔能夠集中精神真係好難講。第三，又係因為鄰近環保大道，普通車輛已經排出廢氣，進出將軍澳堆填區嘅貨車更加排出臭氣，功夫茶幾乎可以肯定，來港參賽嘅國際選手將會不斷投訴：乜你哋香港咁鬼死臭㗎！

唔好以為問題只係出於硬件喎，軟件同樣眼冤。早幾日嘅百日倒數火炬傳送場面冷清，觀眾小貓三四隻，明顯同宣傳不足有關。睇番遠少少，今年五月將軍澳運動場舉行倒數二百日活動，政府請來九個東亞運聯會委員嘅代表出席，你真係估佢唔到，大會竟然全場以粵語廣播，並無英語麗音，一眾外賓聽到一頭霧水。當大會司儀邀請各代表上台就座，噏完八個國家同地區，硬係唔提「中國香港」，東道主代表惟有面懵懵「自動獻身」上台就座，瘀爆鏡！

唉，大家明唔明功夫茶點解愈來愈覺得唔對路？東亞運係香港第一個主辦嘅大型國際賽，到時咯喎，如果畀人覺得你係搞緊一個「將軍澳區小型校際賽」，香港人真係乜架都畀康文署丟清！