為咗令媽媽有個難忘生日，Cynthia除咗預備拿手嘅雞尾酒，仲預備埋九大簋，不過就係外賣嘅居多。第一味係葉劉指定嘅入境處飯堂豉油皇乳鴿，原來佢唔做入境處處長之後，一直對呢隻鴿念念不忘，Cynthia當然買嚟孝敬媽咪。其他主菜包含各國風情，包括越式小食拼盤、印度咖喱雞、泰式海鮮金邊粉同葉劉最愛嘅壽司。

Cynthia專程去入境處飯堂，買佢媽咪指定要食嘅豉油皇乳鴿。 （葉華英攝）

Cynthia喺葉劉做入境處處長期間，成日都陪媽媽返工，有次仲偷偷地戴埋副處長嘅官帽，認真百厭。 （圖片由葉劉淑儀提供）

葉劉感動畀一百分

Cynthia前後用咗四個鐘，花咗二千幾蚊，游走灣仔、金鐘同中環，終於買齊其中六樣主菜，返到屋企喺菲傭協助下，完成埋墨西哥薯片同美式沙律同炒雜菜等菜式。

生日會一開始，葉劉畀滿枱食物嚇咗一跳，佢除咗好感動，仲有種「吾家有女初長成」嘅感慨。其實一個人搞十二人嘅飯局都唔簡單，除咗食物，餐具亦係一個難題。Cynthia喺生日會前一晚先發現唔夠匙羹用，所以喺買嘢食之前拿拿臨去入貨。呢啲小事都咁細心，難怪葉劉話想唔畀一百分都唔得啦。