政情：鬍鬚曾自嘲演技水皮

鬍鬚曾可能自知形象唔討好，新一份預算案嘅諮詢宣傳片尋晚推出，長約三十秒嘅宣傳片，鬍鬚曾只喺尾段現身三幾秒，變相摺埋。

鬍鬚曾尋日喺網誌預告，推出預算案全新電視宣傳片同電台聲帶，話自己過去兩年參與宣傳片演出，外間反應不俗，今年決定再度粉墨登場，又話自知缺乏演藝細胞，絕非「視帝」之材，一而再拍宣傳片，只係為引起公眾對預算案嘅關注喎。

鬍鬚曾喺上一輯宣傳片中扮攝青鬼，驚嚇度十足，又的確引起社會廣泛關注，今次宣傳片改為由幾位老中青演員「黐鬚」扮鬍鬚曾，發表對預算案心聲，鬍鬚曾臨尾現身，話：「留意見，唔使留鬚嘅」，叫大家踴躍發表意見。

不過，既然鬍鬚曾自知無演藝細胞，最好都係直頭唔上鏡嘞，希望佢下年考慮吓。