「閃電俠」保特喺柏林世界田徑錦標賽威到盡，率領牙買加稱霸男子四乘一百米接力賽，繼京奧後再次包辦一百米、二百米及四乘一百米金牌食出「大三元」，袋走三十三萬五千美元（約二百六十萬港元），其中一百米、二百米兩個單項每秒賺一萬一千一百三十二美元（約八萬五千港元），確係跑得快，好世界！

由於衞冕嘅美國隊預賽違規出局，牙買加喺男子四乘一百米賽事以無敵姿態奪金，擅長二百米嘅保特擔任第３棒，雖然佢同最後一棒嘅鮑維交棒時出現小失誤，但牙買加結果仍以破大會紀錄嘅37秒31封王。

遺憾呢次未破世績

保特對於破唔到世界紀錄好懊惱：「都係我嘅錯，我實在太攰，攰得快死了！」隊友鮑維不忘笑住「抽水」：「冇錯，最衰係佢，要怪就怪佢啦！」

三面金牌及兩個世界紀錄，比起北京奧運嘅三金三世績，「閃電俠」柏林之行似乎有欠完美，但保特已成為奧運及世界賽三項短跑「雙料冠軍」，成就前無古人。

名成自然利就，估計保特之後財源滾滾來，單以包辦一百米及二百米兩項個人賽金牌及世界紀錄，已令佢獨得三十二萬美元，若果將保特呢筆巨獎攤勻喺所跑出嘅時間計算，每秒賺一萬一千一百三十二美元！

除獎金豐厚，保特又獲贈一塊長3.6米、闊1.2米、重2.7噸嘅「柏林牆」作特別禮物。保特畀呢份「禮物」嚇呆：「我真係唔知點辦，我本來以為只係一小塊呢！」但他仍不忘牙擦一番：「今次又贏三金，好開心，我都開始崇拜自己。之後點？開Party啦，過去一整個星期都冇慶祝過，所以今晚一定要出去玩。」保特愈講愈興奮：「希望冇傷病完成賽季，然後去度假、去夜總會、去沙灘……」