中環出更：名人牽頭 細味都會文化
熱愛藝術嘅新世界發展聯席總經理鄭志剛（Adrian），尋日現身中環藝穗會，為第一屆「都會文化十月」藝術節助陣，同場仲有珠寶設計師羅啟妍、季豐軒畫廊董事總經理季玉年（Catherine）等收藏家。羅啟妍話自己唔係珠寶設計師，而係歷史學者及家具收藏家，屋企有好多古代家具及瓷器，曾經連食飯嘅碗碟都係真古董。佢笑稱，有次國際拍賣行高層到屋企作客，驚嘆問：「呢度係咪開封？」
為咗支持藝術節，羅啟妍借出部分收藏參加展出，包括佢最愛嘅宋朝瓷器。佢話收藏宋瓷已近三十年，原本一直將呢啲古董當日常碗碟使用，但試過打爛咗，好心痛，依家已經唔捨得用。兩年前佢開始做仿製宋瓷，務求令呢個中國文化巔峰藝術得以承傳。
連串活動 冀吸引年輕人
Catherine亦攞咗幾幅名畫展出，又為藝術節獻策，事關佢多年來幫法國喺香港搞旺「法國五月」，經驗豐富，仲獲法國頒國家榮譽騎士勳章。
藝術節創辦人許劍龍話，藝術節想做到好似「法國五月」咁，透過一系列唔同形式嘅藝術活動，吸引年輕人探索本土文化，搵番身份認同。其中一項活動係同中大新聞與傳播學院學生合作，透過一分鐘短片展現古玩及畫廊雲集嘅荷李活道鮮為人知嘅一面，例如正面臨淘汰嘅活字印刷行業。
許劍龍又話，今年初Adrian發現集團位於元朗一地盤內，有一棵百年細葉榕樹，主動喺規劃起樓時予以保留之餘，亦發起藝術家為棵樹搞活動。所以話，保育與發展之間，係可以取得平衡嘅。佢哋兩人仲因為志同道合而創辦「藝術及古蹟資料研究有限公司」，成為今次藝術節嘅重要推手。
卓妮