立法會暑假休會，所以夏天係高官放大假嘅黃金檔期。陳太本來想喺六月中至七月底，分三次放差不多一個月大假，但好可能係煲呔一聲禁毒令，不得不乖乖留守崗位，避免十八區民政事務處群龍無首，事關要佢實個「青少年反吸毒社區計劃」。

尋日陳太現身仁濟醫院活動，問起佢今年暑假係咪提早完咗嘅時候，佢即刻提高聲調話要「返嚟做嘢」，再問佢係咪要幫手搞禁毒呢？佢反應好大，解釋禁毒係禁毒處搞㗎嘛，佢哋只係配合，總之希望青少年唔好吸毒啦！將話題一轉，問吓佢民政事務總署已連續幾日開避暑中心，究竟中心有無咩嘢消暑良品呢？陳太終於露出笑容，推介中心內有最健康嘅嘢：清水。佢鬆咗口氣後就急急腳走人。