前經濟發展及勞工局局長葉澍堃（Stephen）做官時已經出名識飲識食，退休後更加愈玩愈專業，除咗拜師學煮小菜，又約埋班志同道合嘅老友周遊列國搵好嘢食。Stephen個幾星期前又同太太Nancy、專業會議立法會議員石禮謙及其女友Lisa等齊齊飛去倫敦喪食，一次過品嘗十四粒星！
連吞14「星」落肚
究竟十四粒星點樣食落肚呢？原來係講緊法國米芝蓮星級食肆指南嗰啲星星。佢哋一行人在短短六日之內，馬拉松式先後幫襯咗兩間米芝蓮三星食肆、四間兩星食肆，加埋就有成十四粒星咁多。Stephen大讚嗰兩間三星食肆貨真價實、名不虛傳，絕對係不枉此行。
第一間位於泰晤士河邊嘅法式餐廳The Waterside Inn。Stephen大讚啲菜式貼近法國本土頂級餐廳，環境同服務亦絕對一流，但價錢唔算過分。他們五人邊傾邊食邊吹風，一坐就四粒幾鐘，埋單找數每人都只須約一千港元，如果真係去法國食，起碼每人要成三千港元，足足平成三分之二。
扮披頭四過馬路
他們之後再到另一間三星級法式餐廳The Fat Duck，呢間餐廳就巴閉嘞，全球排名第二，僅次於西班牙巴塞隆拿嘅El Bulii，出名到要在兩個月前訂位。不過，Stephen在起程前一星期先至訂枱，純粹係諗住碰運氣，點知去到行程尾聲，突然收到餐廳通知有枱，於是立即臨時更改行程飛奔去食，結果不負眾望，食物、服務、餐廳裝修同周邊環境，都係頂級之中嘅頂級。
Stephen喪飲喪食外，仲舊地重遊三十五年前讀過嘅牛津大學Worcester學院。Stephen係當年港英殖民政府首批保送去英國進修嘅年輕華人政務官之一，如今以退休高官身份再重遊舊地，真係千言萬語，感觸良多。旅程期間，Stephen途經Abbey Road斑馬線，想起四十年前紅極一時嘅Beatles大碟專輯《Abbey Road》，見他雙手插褲袋過馬路個款都幾有型喎，彷彿回到當年！
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |