香港青年聯會早前換屆，同佢爸爸一樣咁低調嘅邱達根，亦參加埋一份，仲初擔大樑，做埋副秘書長，早前新班子首次開會兼聚餐，佢都有出席，仲由頭坐到落尾，認真有心！卓妮當晚都有去湊熱鬧，同佢傾開偈，先知道佢早前由新西蘭購入新馬「藍老虎」，唔經唔覺已出戰一季。

對高達角色入晒迷

「藍老虎」個名聽落似曾相識，邱達根承認馬名係來自著名動畫「高達」，皆因佢自細睇呢套動畫大，對片中角色入晒迷，本來佢打算用「高達」勁敵「紅彗星」做馬名，希望新馬好砌得。點知翻查資料後先知已畀人捷足先登用咗嚟做馬名，惟有以片中另一角色「藍老虎」頂替。

好彩「藍老虎」不負所望，出賽一季以嚟贏過一次頭馬及一次季軍，合共捧走五十幾萬銀獎金，算係有交代喇。問邱達根他日再購新馬，會否繼續從「高達」動畫攞靈感？佢話未諗到咁遠，到時先算喎。

卓妮