高比仔殺到！今屆帶領湖人勇奪NBA總冠軍並獲選為總決賽MVP嘅高比拜仁，將於今晚九時許從台灣乘搭私人飛機抵港。休息一晚後，聽日就會喺尖沙咀同灣仔，出席兩項公開活動，想一睹高比仔風采嘅球迷，記得留意佢嘅行蹤喇！

高比拜仁今次亞洲之旅共有六站，分別係馬尼拉、新加坡、台北、香港、上海同埋成都。高比仔完成台灣之行後，今晚就會搭私人飛機抵港。據悉，高比仔會喺特別通道離開機場，而唔會喺機場嘅公眾閘口露面，所以球迷想迎接佢嘅話，最好就喺佢下榻嘅酒店。

聽日踩落修頓室內場

至於聽日嘅行程，高比仔會先到Nike尖沙咀嘅旗艦店與fans會面，並且同球迷交換禮物，之後就會殺入灣仔修頓室內球場，同本地籃球員交流，並指導年輕球員嘅籃球技巧。高比仔會喺周六早上離開香港，到上海繼續行程。

此外，高比仔喺新加坡站接受訪問時表示，有信心湖人會簽番拍檔奧當。上季擔任第六人嘅奧當，係湖人奪標嘅重要功臣，球季結束後轉為自由身，高比仔相信來季兩人再有機會合作。另外，高比仔表示有興趣代表美國出戰明年世錦賽及二○一二年倫敦奧運，與K教練再次並肩作戰。

高比仔訪港行程表

7月23日 9:00-9:45pm 抵達香港國際機場，隨即下榻半島酒店

7月24日 3:00pm 到訪尖沙咀廣東道Nike旗艦店

7月24日 4:00pm 到灣仔修頓室內場與fans會面

7月25日 7:00am 離開香港