尋日星期日，肥亨不辭勞苦去到將軍澳一間學校講道，分三場演講，吸引幾百人捧場，卓妮都有去捧場，肥亨發揮一貫搞笑本色，除咗叫人咪濫藥食壞腦外，仲大談金融海嘯下點樣理財，觀眾洗耳恭聽，以為佢有炒股貼士醒畀大家，原來佢口中所講嘅財富，唔係現兜兜嘅「茄薯」（Cash），係健康同親情。

上天啟示遞信辭職

係人都知肥亨腦入面生咗個血管瘤，令佢最終選擇掛冠，唔少人覺得佢畀病魔打敗，但肥亨就話多得耶穌啟示至真。佢話年前得知患病後，心情曾忐忑不安唔知係咪應該引退，有次佢約朋友打高球，臨出門同神講，話如果嗰日打波異常出色，就證明耶穌都認為佢退出官場較適合。

結果肥亨當日打波如有神助，連波友兼立法會議員黃宜弘都嘖嘖稱奇，肥亨心知係上天的啟示，於是唔再猶豫即時遞信辭職，冇幾耐金融海嘯殺到，唔少財金高官畀人「炳」到體無完膚，佢話望番轉頭，辭官確係一個明智決定，如果自己仲在位的話，可能已經畀人問責下台喎，都不知講得幾輕鬆。