財委會尋日討論並通過撥款五十一億喺屯門興建焚化爐，同屬建制派的石禮謙竟然向劉皇發開火，認真少見。發叔同大舊石一個支持政府方案、一個就反對，各有各嘅考慮。大舊石發言時忍唔住對去立會解畫嘅環境局局長邱騰華開火，叫佢唔使成日多謝發叔，事關發叔係行會成員，梗係要幫政府啦！其實發叔係屯門區議會主席，頂硬支持政府喺屯門起焚化爐呢啲厭惡性工程，邱騰華講多兩句多謝發叔都好正常啫。
面對大舊石咁挑釁性嘅言論，「新界王」發叔又點會示弱。發叔話自己雖然係行會成員，但一向以事論事，直斥大舊石嘅言論不當，對佢係一種侮辱。發叔講到咁嚴重，議事堂嘅氣氛當堂凝重起來，點知佢話鋒一轉，話自己唔會同大舊石計較，因為佢哋係好朋友喎。發叔話音一落，議事堂哄堂大笑，大舊石之後發言都話自己唔係唔尊重發叔，以和為貴收場。