本文重點
已經正名為Ｈ１Ｎ１甲型流感尋日終於殺到香港，港府急謀對策，根據○三年沙士爆發嘅經驗，經濟股市必定受疫情影響。港交所主席夏佳理（Ron）就擔心，疫情一日未明朗化，都唔知對經濟影響會有幾深，而香港向來係外向型經濟城市，阿Ron仲擔心新上場嘅美國總統奧巴馬能否應付接踵而來嘅多場硬仗。
愛駒大熱冇肉食
卓妮尋日喺沙田馬場遇到阿Ron，問佢會否擔心疫情影響回春嘅股市，佢諗咗一陣，可能身份問題唔方便回應，反而話：「我都話奧巴馬要打四場硬仗啦！一來要解決伊拉克問題，又要解決經濟問題，但經濟未搞好前，又爆發甲型流感。」聽阿Ron嘅口氣，似乎都幾擔心奧巴馬前景喎！
其實尋日阿Ron同太太入場主要為愛駒「聖河」出賽打氣，開跑前問阿Ron有否勝算？佢話就算有都無用，因為愛駒賠率熱到得兩倍。對於向來「刀仔鋸大樹」嘅阿Ron來說，就算贏咗場賽事都冇肉食，但最終都係跑輸咗。
不過，尋日唔單止阿Ron輸馬，事關第八場有五匹名人馬同場較量，包括賭王何鴻燊嘅「爆冷」、玩具大王蔡志明嘅「銀太陽」、鄉議局主席劉皇發嘅「真龍船」、劉皇發兒子劉業強嘅「好知己」及全國政協施子清兒子施榮忻嘅「零距離」，但五人都無入馬場為愛駒打氣，唔知係咪咁，五隻馬都跑到無晒影。
卓妮