政情：李少光唔敢長線遊

記得上次泰國騷亂，保安局局長李少光去咗日本公幹，保安局安排包機接市民返港遲人半拍，最後搞到立立亂，結果光哥要孭起隻鑊，除咗要上立法會解釋事件外，仲要公開道歉，令佢嘅民望暴跌二十個百分點，光哥更因此由最受歡迎高官變成不合格局長。

今次復活節假又撞正泰國大規模示威，光哥唔知係咪見過鬼怕黑，所以放長假都唔敢去外國旅遊，只係選擇搭幾個鐘頭車就去到嘅潮州打高爾夫球，就算大吉利是泰國嘅示威行動升級到影響外遊港人時，佢都可以即時返香港坐鎮。

佢臨走之前仲千叮萬囑局內嘅同事要睇實泰國嘅形勢，仲話有要事可以直接同佢聯絡。睇嚟泰國騷亂一日未平息，光哥一日都要提心吊膽過節喇。