立法會尋日就取消煙稅決議案動議辯論，雖然事前大家都知道決議案會被大比數否決，不過負責呢條決議案嘅食物及衞生局依然交足戲，派出一眾政務官同局長政治助理陳智遠親自到立法會督師，總之係一票都不能少！陳智遠一行五、六人嘅狗仔隊十點幾已經企晒喺立法會各個入口，每人手攞一疊印滿議員相片嘅文件，明顯為數票而來。
其實決議案九成九會被否決，何須咁大陣仗呢？陳智遠就解釋，一來擔心投票時議員去咗食晏趕唔切返嚟投票；二來反對票多啲，更加顯示大部分市民支持政府加煙稅嘅做法，可以為嚟緊全面實施禁煙條例鋪路。
陳智遠首次做狗仔隊領軍，本來諗住同佢影番張相，點知佢一見相機反應就好大：「影相？唔好啦！」仲立即避走前廳添，反而佢手下嘅狗仔隊員就好大方，面對鏡頭泰然自若，新入政府嘅陳智遠，睇嚟要向同事多多學習吓。決議案最終以三十二比四嘅大比數被否決，食衞局今次派咁多人打贏梗嘅仗，似乎有浪費人手之嫌噃！
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |