本文重點
雖然打入季後賽嘅機會已愈嚟愈渺茫，但鳳凰城太陽似乎仲未放棄，尤其係對住火箭，太陽特別想贏，因為奧尼爾要證明佢寶刀未老！尋日奧尼爾遇上宿敵姚明，後者有二十分及十四個籃板球嘅頗佳數據，但「鯊魚」整體表現比「小巨人」出色，再加上拿殊打出近期佳作，最終太陽以一一四比一○九贏波，只可惜同日小牛亦報捷，因此太陽未能拉近距離。
奧尼爾技壓姚明
奧尼爾Vs姚明，永遠都係NBA焦點之一，縱然奧尼爾已踏入黃昏年代，但近期對親姚明，往往打出水準之上，近三次對賽中，奧尼爾得分都多過姚明。於個人對決中，奧尼爾今場亦佔盡優勢，姚明多次防守都顯得非常吃力，相反奧尼爾瞓身救波、拆你屋乜都出齊，最終「鯊魚」個人奪得廿二分、十個籃板、三次偷波及兩次封阻，完全顯出狀態大勇、寶刀未老！
雖然姚明數據上亦算不俗，可惜佢今場做唔到領袖角色，最關鍵嘅第四節竟然僅得兩分，又出現無謂犯規及被奧尼爾封阻等低級錯誤，表現令人失望。