關心妍下一站……媽咪

關心妍（Jade）去年10月24日在印尼峇里舉行三百萬婚禮，下嫁拍拖兩年的金融才俊楊長智（Jonas），自此Jade展開了她的三億闊太生活，不過這位新任楊太相當「懵」，結婚近五個月，仍被枕邊人嚇親，又誤將家用當「意外之財」。

Jade談及婚姻生活，以甜蜜又搞笑來形容：「我拍拖時未試過同男友同居，結婚後，有時我半夜醒來，見到隔籬有個男人瞓喺度就嚇一跳，諗諗吓，先醒起原來我已經結咗婚，隔籬嗰個係我老公，可能我仲未習慣做人老婆啦。」

唔知老公畀家用

一向和老公經濟獨立的Jade，亦不習慣用他的錢，她說有次check銀行戶口，赫然發現存款結餘多了一大筆款項，當時還為這筆「意外之財」擔心，被老公笑罵：「係我入畀你做家用架，傻婆。」頓令Jade又羞又喜。雖然瘀爆，Jade又覺得心甜：「其實我從來冇問過老公攞家用，亦都冇呢個意識，只係我老公好照顧我，所以我戶口經常會不定期入一筆錢。」

拍拖和婚後生活，Jade謂基本上沒有太大分別，但相處後才發現原來夫妻間共同生活，需要極大的包容及遷就，其中兩人最不夾是，一個井井有條，一個不修邊幅。自言「呢啡」的Jade，衫、褲、鞋、襪習慣通屋擺，有時老公看不過眼出聲投訴，但她每次都藉詞推搪：「記得有次老公叫執好啲衫，我懶所以作咗個藉口，話其實啲衫好攰，不如畀啲衫攤喺度幾日先啦。」她說老公聽到都笑，默許她遲幾日再執拾。

Jade多謝上天的眷顧，令她嫁得好老公。（資料圖片）

Jade自言和老公是絕配，大家可以互補不足。

藉歌聲助人重生

Jade完成婚姻大事後，下一個目標是為老公生兒育女，她一直抱順其自然的態度，反而朋友比她更心急，不時提供生仔秘方：「有啲朋友話食鹼性同酸性嘅食物，可以有助生男或生女，我聽得太多，記到亂晒大龍，唔知邊樣打邊樣。」

其實Jade想將生育計劃延至兩年後才實行，因為她要投入新碟的工作，但她強調現時出碟心態和以前大大不同：「以前就話想有知名度，依家我希望藉自己嘅歌感動同幫助到人，私底下我曾探訪過有自殺傾向及有毒癮嘅人，佢哋話得到我嘅關懷，令佢哋重生，我覺得呢份滿足感比得到任何獎項更大。」

Jade希望自己的歌，可以幫到弱勢社群。

老公體貼驚喜不絕

Jade大讚老公Jonas是個心思細密的浪漫派，經常製造小驚喜氹她開心：「我好大頭蝦，乜乜拍拖、生日，統統都唔記得，佢會記住兼部署好，有時突然約我食飯，仲提我要着得靚啲，去到先知原來佢訂咗枱同我慶祝，嘻、嘻。」最令女士們恨得咬牙切齒是她經常收到最低消費四、五萬元起的Hermes手袋，至目前已有三至四個，她說：「佢送Hermes手袋畀我，方便我襯衫，又夠保值同襟興，有時佢見到啲特別版好靚，都會買嚟送畀我。」

回贈肉麻情歌

至於Jade又送甚麼精選禮物氹老公開心？她說曾送過不同的禮物，但全不合心水：「老公好有品味，唔知佢鍾意乜，所以我改送『手作仔』，雖然價錢唔貴，但佢好鍾意。」她曾親手將貼滿幾千粒水晶的香檳樽送給老公，她說：「當老公知我黐咗成三個月，睇見我啲指甲都黐滿萬能膠水漬，花鬼晒，心痛又感動。」而最令老公催淚的禮物是：「我喺聖誕製作咗一張唱片畀佢，是首肉麻情歌，歌詞大意係話我冇諗過咁幸運會識到佢，我愛佢愛到可以放棄一切，希望同佢一生一世，佢聽到喊呀。」