大帝最年輕萬五分先生
勒邦占士再度超越高比拜仁！相信唔少球迷都認為，當今NBA球壇就係「大帝」勒邦占士同高比拜仁嘅天下，不過「大帝」最優勝之處係年輕，仲有大把日子去超越高比仔嘅成就。占士尋日面對公牛就射入個人生涯第15,000分，以25歲零79日，打破高比仔嘅舊紀錄，成為NBA史上最年輕15,000分得分者，同時協助騎士輕取公牛92比85。
今季係「大帝」第七個NBA球季，而呢位天之驕子尋日亦獲得生涯另一個里程碑，騎士作客公牛時，戰至第一節中段，「大帝」藉一記罰球射入個人職業生涯第15,000分，以25歲零79日，打破高比拜仁在○六年創下嘅27歲零136日舊紀錄，成為NBA史上最年輕嘅「15,000分先生」。
破埋奧尼爾場數紀錄
占士賽後表示：「我要感謝上帝，我出生時帶着上帝給我嘅禮物，我要將這天賦嘅厚禮用喺籃球場上。我希望一直保持健康，繼續打破更多紀錄。」除年齡外，占士僅用539場賽事去獲得15,000分，亦打破隊友奧尼爾547場賽事嘅舊紀錄。
占士今場交出29分及搶下11個籃板球，繼續成為贏波頭號功臣，可憐公牛續有戴歷羅斯、鄧格及諾亞等主將因傷缺陣，讓足車馬炮下，自然難敵騎士。騎士贏波後，總成績已達到55勝15負，因同日湖人亦擊敗木狼，所以騎士維持領先湖人場數3場半，衞冕常規賽冠軍非常樂觀。
■本報綜合報道