上網偷窺香港奇景

靚仔唔打格

為咗保障私穩，Google街景服務盡可能將人面模糊化，不過一樣有漏網之魚，好似巴士車身電影廣告就見到古天樂靚仔樣；補習天王宣傳廣告K.Oten一樣唔使遮醜，究竟係人面辨識程式出錯抑或係人為原因呢？另一方面，台灣有裸女相，香港都有「露點相」，不過全部都係男人。點都好，奉勸大家一句，出街最好着番件衫。

外國街景更多嘢睇

街景服務在外地推出兩、三年，唔少千奇百怪嘅「街景」更上埋新聞報道，除咗上星期台灣嘅窗前裸女之外，之前仲爆出影到UFO、外星人甚至鬼魂，只要大家有無限時間，相信會搵到更驚人發現！

拍攝車自拍入鏡

去年初Google拍攝車出動時，已有網友點咗佢相，但估唔到在街景圖見到真身，原來係因為拍攝現場有大面積嘅鏡或玻璃幕牆搞到現形。不過對比外國會出動人力三輪車或者雪橇進行拍攝，香港拍攝車就冇乜特別。

上了鏡可舉報

唔少已推出街景服務嘅國家，都關注個人私隱問題，有人被影到裸體曬日光浴、在路邊小便。大家萬一搵到自己嘅不雅相咁點算？原來街景服務頁面上加入咗「報告問題」選項，大家可以匯報畀Google知，但反應就未必有上星期嘅「台灣裸女」咁迅速。

Google街景服務小檔案

Google街景服務於2007年5月在美國推出，當時只有小部分美國城市街景圖，到2008年8月先至登陸亞洲，首個着陸點係日本。香港嘅街景服務唔算遲，亞洲地區計只比日本（2008年8月）同台灣（2009年8月）慢，不過唔好以為香港地唔算大就好易拍攝街景，據Google所講，拍攝車輛在香港街頭行駛咗7,912公里，而且好天時間唔多，總共拍攝咗好幾個月先完成。

網站：http://maps.google.com.hk/streetview/

撰文：布偉倫