絲絲講場：投資十方別有原因 鄭志剛睇好陳志
「彤叔」乖孫鄭志剛（Adrian）掌舵嘅新世界策略投資近年頻頻出擊，好似聽日掛牌嘅媒體股十方（01831），就係佢第一次以上市前投資者身份投資。不過唔講唔知，Adrian話投資十方除咗因為行業前景好之外，原來仲係由於老闆陳志曾經做過公務員喎。
人脈夠廣予人信心
新世界策投、建銀國際及中化歐洲今次一齊投資咗共3,500萬美元（約2.73億港元），咁大投資，Adrian同絲絲講，話除咗因為覺得中國媒體廣告行業嘅長遠發展好可觀，原來曾經做過福州閩候稅務局、福州經濟技術開發區稅務局副局長及科長嘅十方主席陳志亦畀咗佢好大信心，皆因佢人脈夠廣，而且有好好嘅人事關係喎。
由Adrian「揸Fit」嘅新世界策投，近年除咗投資咗人和（01387）、十方以及就嚟上市嘅農業股地利，佢話未來仲會繼續搵多啲新投資項目，目標行業包括內需、媒體、新能源及農業等。
余絲韻