絲絲講場：團購網始祖攻亞洲 Groupon購港uBuyiBuy
電子商務模式五花八門，B2B、B2C、網上拍賣已經唔係新鮮事，近年新興嘅「團購」，更加將互聯網集腋成裘嘅特性發揮至極點。怪唔得網上巨人Google近日亦傳出想用60億美元，收購美國團購網站始祖Groupon，而Groupon亦正向亞洲市場「插旗」，收購咗推出服務只有半年嘅香港團購網uBuyiBuy，並再次成就咗一位年輕人網上創業嘅成功故事！
年輕創業成功實例
「團購」簡單嚟講就係將消費者集合埋，透過大規模嘅採購向零售或服務供應商爭取價錢優惠，由於當中結合「人傳人」嘅推廣效應，所以亦成為新興嘅促銷途徑。今次被收購嘅uBuyiBuy，係由三十出頭嘅楊聖武（Danny）及區致恒（Nelson）聯手創立，今年六月正式推出服務後，喺十月已做到按月計收支平衡嘅成績，營運短短6個月就已被業內龍頭主動提購的確唔簡單，而喺收購後，Danny及Nelson仍然會負責uBuyiBuy嘅營運。所以話年輕人網上創業致富，唔只係外國或內地至有，香港其實亦有唔少成功例子。
余絲韻