依家全城最熱門話題之一，肯定係國際大鱷揸旗嘅對沖基金紛紛來港，部署炒起內地，繼索羅斯後，早前盛傳會喺短期內進駐香江嘅倫敦大型對沖基金GLG Partners，喺本周二（上月三十日）正式取得證監會牌照來港搵食，GLG Partners嘅兩名負責人員胡錦科及張軍以前都喺大摩做。覓得猛將之餘，最有趣嘅係GLG辦事處竟設於中環遮打大廈13樓，亦即係證監會辦事處大本營嘅樓上，都算非常巧合！
GLG成立超過15年，喺行內名氣唔細，後台更加勁，今年十月被大型對沖基金公司Man Investments收購。
今次公司攞正牌，以GLG Partners HK名義在港營業，並攞齊4個牌照，包括證券交易、期貨合約交易、就證券提供意見及資產管理。GLG其實今年初已傳出有意來港設分公司，近期食住QE2熱錢氾濫並流向新興市場個勢，喺香港大展拳腳。
歐美大型對沖基金湧入香港，對香港拓展資產管理中心當然係好事，不過內地就明顯擔心呢股趨勢愈演愈烈，對沖基金最終都係瞄準內地，或影響內地金融市場穩定，呢場角力大家真係要拭目以待！
余絲韻