市場熱線：光國具備開車條件

股市升就美金跌，匯市同樣係單邊市，美匯指數跌到78.87，毫無技術反彈之力，歐元升到1.36，Yen干預完之後又去返83.6，邊個係最大貨幣操縱國唔使問亞貴。美金咁弱，搞到資產同商品價格係咁升，呢排啲金股、金屬股、鋼鐵股、煤炭股都升得好靚，屬於抗通脹嘅選擇。

內房股短期冇運行

總之，美金維持弱勢，花旗息口一路冇得升，香港嘅樓市無論出幾多招幾多式都好難㩒得低。尋日政府拍賣兩幅奀地，原本都冇乜人理，點知柴灣塊地竟然出現16年以來首次要收番，另一幅粉嶺地就以高價成交。政府懶好心諗住推兩塊奀地「照顧」吓班無力上車人士，點知班地主佬完全唔「蘇」，事後仲一齊彈到塊柴灣地一文不值。

講番魚缸，尋日最靚嘅係砵砵車股，八月賣車數據公布後炒足接近一個月，九月嘅數據又嚟緊，是龍是蛇股價已有啟示，至少車企「金九銀十」銷情自己心知肚明。

不過，祖國魚缸就好唔爭氣，滬綜指臨尾都要倒跌。祖國過埋今日就放7日假，中央假期前後又出招「打倒地主」，詳情睇老記報道。所以內房股短期都冇運行。雖然同坐一條船，但中港魚缸各自修行，個AH股溢價指數尋日跌到93.41。港股依家跟住花旗搵食，花旗數據好時自然升，數據差時則憧憬QE2，依照咁嘅邏輯，想窮都難。

好多股票呢排都創咗新高，未創新高嘅已可歸為「落後分子」，呢類股又可分成「殭屍類」同「蠢動類」，老古見隻光大國際（00257）可列後者，隻股自從四月份派完舊年全年成績表之後，就由4蚊樓上一口氣插到3蚊樓下，但跟住就係一條緩慢嘅上升軌，爬吓爬吓卒之突破咗3.73元嘅阻力位，尋日收報3.87元，如果能重返4蚊嘅話，好多股民可望重返家鄉。

祖國搞環保誠意足

光國話晒都係實力分子，舊年大賣環保概念，但自從舊年尾哥本哈根氣候峰會一拍兩散之後，加埋力倡環保嘅歐洲自身難保，好多投資者驚住環保會OUT，不過祖國用行動證明對環保「真心不變」，投資者於是慢慢買番起光國。

光國發展環保產業並冇放慢到，一瓣飽和就轉攻另一瓣，新目標係風電，當然最大兩項業務仍係污水處理同燒垃圾發電，祖國舊年已加過一次水費，今年再加水費又傳過幾次，但祖國嚴防通脹又點會畀公用事業加價？不過，加水費鼓勵節約用水始終係長遠方向，加埋「十二‧五」規劃即將敲定，呢隻環保龍頭股不蠢動待何時？

戰報

神威藥業（02877）+22%

小尾於本月十四日指神威藥業獲多間大行唱好，昨高見27.65元，較推介當日低位升22.3%。

恒鼎實業（01393）+12%

古勝於十五日推介恒鼎，指其盈利增長可持續，昨高見7.57元，較推介當日累升逾12.8%。

古勝