期指觀瀾：小注做淡嚴守止蝕
隔晚美股先跌後拗腰回升，加埋期指結算及政府賣地，十月期指開22,271點，在現貨開市前，已上到22,350點水平，之後全日大部分時間於22,350至22,472點間上落，十月期指以近午市低位22,347點收市，九月期指以22,382點結算。回顧九月份，好友都算係由頭贏到尾。
A股拒絕再升，滬綜指亦係四月以來，第二次出現10日跌穿20日線的轉弱訊號，再有昨日賣地柴灣地皮收回，是限制午市港股再向上攻的主要原因，否則以853億元的大成交額，十月期指理應可以更逼近22,512點阻力。
無新消息，短期港股要睇外圍做人，內地股市有輕微轉弱迹象，美股方面，憧憬新一輪量化寬鬆出台的炒作，似是有餘未盡，隔晚華爾街兩大指數，道指及納指即市分別試一試10日線支持（10,722點及2,341點）後即見反彈，是否為後市提供新支持位的參考，相信一兩天內會見真章。由於超買情況已相當嚴重，尋日小注在22,400附近試沽，如期指收市突破22,512點，會先行止蝕，否則目標睇21,790點。
John Mullen