國美（00493）黃光裕與陳曉兩大陣營嘅權鬥炮聲隆隆，但負責前線業務嘅營運員工一於好少理，以國美集團副總裁李俊濤為首嘅營銷團隊，近日喺北京與多個主要嘅家電廠商會面，簡介國美喺中秋以及「十‧一」長假期嘅促銷活動。據與會人士話，參與嘅管理層只談業務，真係懶理上市公司嘅權鬥。
黃金周一向係內地家電行業嘅重要戰線，國美與供應商剛召開嘅年度交流論壇，國美營銷團隊就公布「300億元備貨、500億元廠商合作」嘅大規模促銷計劃，國美喺個別城市嘅管理層更話要攞到七成市佔率，其雄心壯志似乎未受權鬥事件影響！
講番呢場權鬥，最新發展係黃光裕呢邊透過代表，繼續向已表明支持陳曉嘅貝恩示好，大有「只反陳曉、不反貝恩」嘅意思；至於「中資神秘大戶」鄭建明方面，反而無甚動靜。絲絲尋日去搵鄭氏，但只見到佢嘅得力助手，佢話鄭建明目前身在海南，由於佢經常中港兩邊走，外界要直接聯絡佢恐非易事！
至於黃光裕家陣仍服刑中，有傳聞話佢喺監獄有個「辦公室」，仲有直線電話咁誇張。據講佢每次簽文件都有監督機制全程錄影，如出現問題更會受處罰。
余絲韻