絲絲講場：陸東TCL通訊啱Key
TCL通訊科技（02618）委任咗陸東做獨立非執行董事，尋日Andrew（陸之洋名）第一次喺TCL通訊L嘅場合亮相，佢透露當初TCL通訊搵佢入公司，雙方只係用咗一個月時間就傾掂數，佢加入TCL通訊係希望多啲了解呢個行業，同時幫助TCL通訊，最重要係大家互相學習。
曾派人巡廠做研究
Andrew之前做嘉瑞（00822）嘅獨立非執董，似乎對工業股情有獨鍾，但佢強調只要品牌好、有好人才及銷售渠道嘅企業，佢都有興趣，但「做毛公仔冇利潤」嘅公司就興趣不大。對於TCL通訊當年「走出去」收購ALCATEL，佢話中國企業「走出去」唔易，融合要付出代價，只要幫到公司業務發展，購併係一件好事。
TCL通訊首席財務官廖旭東話，陸東曾派人到工廠參觀，認真做過研究，又見過公司所有管理層及交流意見，發覺大家理念相同，雙方又夾得埋。
講開TCL通訊，佢哋推出咗Android平台嘅智能手機，不過會先喺歐洲市場亮相，公司首席執行官郭愛平話，佢哋嘅客戶喺歐洲，所以喺歐洲推出智能手機，今年底先會回歸到大陸及香港市場，佢仲話會推出多款智能手機，而且價錢具有競爭力。
余絲韻