尋日中秋佳節，好多人放工後都想急急腳返屋企過節，新地（00016）就好體恤員工，每年中秋佳節都專登畀員工早啲放工，返去同家人共慶團圓，尋日佢哋喺下午4點半就放工。絲絲老友仲話，平日公司午餐包伙食只係五餸一湯嘅家常小菜，但每逢大時大節就會「加料」，有燒肉、雞及甜酸大蝦等，絲絲聽到都真係想食埋一份。
講開新地，佢哋最新公布嘅業績認真「靚仔」，尤其係租金收入升得最標青，老友話副主席郭炳聯喺租務方面真係落咗好多心機，佢唔單只平日工作勤力，好多時喺星期日會微服出巡旗下嘅商場，除咗觀察人流外，仲會入埋舖同啲商戶傾偈，睇吓點樣可以做得更好，收集得嚟嘅情報，就會向租務部啲同事反映。
老友仲話老闆除咗巡場外，就連新地一啲商場嘅租務例會，郭炳聯都會親自落區主持；至於新地喺上海嘅兩大項目上海國金中心及上海環貿廣場，就更不在話下，佢已親自飛去上海好多趟。
此外，郭炳聯亦都好重視九龍環球貿易廣場觀景台天際100呢個項目，雖然呢個觀景台今年第四季先招待公眾參觀，但喺下周一就會舉行「頭炮」記者會，介紹觀景台嘅特色及負責接待員工嘅制服，郭炳聯仲會親自主持記者會添。
余絲韻