「股神」巴菲特個朵無人不曉，上市公司開達（00180）尋日發通告話賣咗上海物業，買家竟然係「巴菲特投資公司」，絲絲以為係巴菲特投資內地物業，睇真啲原來呢間係內地知名嘅「山寨」投資公司，係溫州一間私募基金，只係掛名公司，與巴菲特絕無關係。
開達嘅通告話，佢哋賣咗上海16個商業單位，作價7,761萬元，買家係巴菲特投資公司及溫州金點投資公司，絲絲發現，英文版通告係直接用「巴菲特投資公司」嘅中文名，冇英文譯名。查實呢間公司只係位於溫州市主營資產管理、房地產開發經營及證券市場投資等嘅公司。
絲絲向內地朋友打聽，佢話呢間公司係溫州嘅私募基金，與股神冇關係。朋友又話，呢間公司曾經因「巴菲特」呢三個字引起好大嘅笑話，話說佢哋買入內地大連銀行1,000萬股股權，內地人以為正版巴菲特投資呢間銀行，心諗喺「股神」效應下，銀行股必定大漲，點知有內地記者發現「此巴菲特非彼巴菲特」後，令好多「股神」粉絲失望。
絲絲想提醒一下「股神」，不如快啲喺中國註冊自己個中文名啦！
余絲韻