喺金融海嘯時期唔使英、美政府打救嘅滙控（00005），隨着環球經濟好轉，今年中期業績已見改善，稍稍恢復元氣之際，又要面對另一挑戰。滙控集團行政總裁紀勤尋日公布咗本年度全球員工意見調查，結果顯示滙控員工整體工作滿意指數係68%，較去年減少咗3個百分點，未能達到集團定下嘅72%目標。
呢次調查有超過26.9萬名滙控員工參加，集團藉此收集員工對工作嘅意見及感受。調查發現，滙控員工對集團嘅企業可持續發展最為滿意，得分有80%；另外，員工對集團喺過去3年所作出嘅改進亦持正面看法；不過，集團喺報酬、員工個人發展及表現管理方面嘅得分就較低。
據知滙控收到呢啲意見後，喺未來3個月會進一步作出跟進，各地區及環球業務行政總裁，以及個別經理包括香港區經理，會就調查結果採取相應行動。
睇嚟滙控真係要加把勁諗吓計仔挽留人才先得喇，皆因呢排香港金融界確實求才若渴，絲絲就見到唔少銀行、投行及保險界專才轉工跳槽，滙豐銀行作為香港最大僱主之一，喺人力資源管理方面對市場有指標作用，若然有好多員工畀競爭對手撬走，相信對市場或多或少會有影響。
余絲韻