騰訊（00700）購併康盛創想嘅傳言唔係空穴來風，康盛終於證實與騰訊正式「聯婚」嘅消息，呢單「刁」涉及金額唔算大，不過對內地互聯網發展嘅影響就非常深遠，甚至被認為係騰訊馬化騰與阿里巴巴馬雲之間嘅「騰雲大戰」最新戰線！
據說今次收購涉資約6,000萬美元（約4.68億港元），呢單交易咁引人關注，係由於康盛過往引入Google入股，更重要係康盛嘅主要對手德天信息科技被馬雲嘅阿里集團收購。內地嘅分析話，騰訊購併康盛後，會陸續將QQ、搜搜及財付通等產品與康盛嘅Discuz社區平台結合，與阿里集團收購德天信息後陸續推出嘅社區及垂直網站服務作直接競爭，從而拉近騰訊與阿里喺電子商務發展上嘅距離。
雖然騰訊嘅QQ未來可能向電子商貿方面延伸，不過德銀發表報告話主要基於估值關係，將騰訊評級降至「持有」，並將目標價調低3.1%至155元，騰訊尋日股價再次「插水」大跌4.45%至141.5元，成為最大跌幅藍籌，所以今次購併能否改變外界對騰訊業務前景嘅睇法，仍有待觀察！
余絲韻