滙豐銀行不時會搵啲管理層與學生分享理財之道，今次就搵咗風趣幽默嘅香港區總裁馬凱博（Mark哥），參與分享環節嘅學生代表來自五間中學，佢哋好有興趣咁問Mark哥幾時做第一份工、點樣用啲錢以及點樣安排仔女嘅零用錢等。
Mark哥透露，自己喺十二歲時就開始利用假期做兼職工作，原來佢咁細個就出嚟見世面，唔怪得依家咁識講嘢，去到邊都咁識搞氣氛。佢話自己當年做過送報紙、到果園幫手收成，目的為咗賺夠錢買手錶。
依家已經係三名子女嘅父親，佢經常教仔女儲蓄嘅重要性，提醒佢哋要量入為出。對於喺寄宿學校讀書嘅大女就會畀一定金額嘅零用錢，由佢自己分配點用；另外兩個細仔每個禮拜只係得兩英鎊，即約二十五蚊港紙。Mark哥話聽到有啲同學每月嘅零用錢有成一千蚊咁多，就講笑咁話一定唔會畀自己嘅仔女知道。
余絲韻