隨着時代進步，醫療設備日益先進，中國人嘅諺語「人生七十古來稀」已經「Out」咗，「長命百歲」先至係目標。好似73歲嘅意大利首富兼總理貝魯斯干尼，喺去年年底透過旗下企業Fininvest，增持從事生產治療癌症藥物嘅醫療企業Molecular Medicine（MolMed）股權至24%，又資助研究延長人類平均壽命至120歲嘅科技企業，冀雙管齊下同時解決健康及延長壽命嘅問題。
佢咁緊張研究長生術不無道理，始終人年紀大咗，精力及體力都會大不如前。好似喺○六年演講嘅時候，佢曾經因為身體不適突然暈倒；去年十一月出席德國慶祝柏林圍牆倒下儀式，就被記者偷影到佢「瞌眼瞓」，所以佢心急啲都可以理解。
曾經「打低」前列腺癌嘅貝魯斯干尼早前好有信心咁話，預期可以喺總理任期完結前成功研究出消滅癌症嘅藥物，加上佢大力投資研究延長壽命嘅企業，難怪佢揚言：「可能到我100歲嘅時候，就會諗吓繼任人嘅問題。」
貝魯斯干尼有唔少志同道合嘅同道中人，好似75歲嘅眼鏡製造商Luxottica創辦人偉基奧及69歲嘅大型投行Mediolanum嘅舵手多里斯，都同佢一樣加碼投資MolMed，希望治癌藥研究快啲有成果。
余絲韻