市場熱線：百麗食正條水

本地魚缸在上星期幾乎都係打橫行，成交額仲一直縮水。不過「野豬」有報告指，過去一星期流入本地魚缸的資金創近兩年新高，在交投如此淡薄下，資金究竟流入本地魚缸哪一個角落，古勝烏卜卜！估計「野豬」所指係流入港股基金的資金有所增加，至於港股基金有否入場加碼則無從稽考矣！

雖然金管局開晒口，指錢莊批出按揭所提供的利率優惠過分賣大包，但一心搶佔按揭市場的「獅子錢莊」未有收斂，反而更積極爭取生意，令本地地主開售新樓盤都能賣個滿堂紅，加價加推再加價。在一手住宅成交仍然暢旺下，本地地主股價料可企硬，支撐本地魚缸。

本周開始陸續有紅色錢莊派成績表，預料將成本地魚缸的後市關鍵。紅色錢莊近兩三個月一直受祖國逐步收緊銀根所困擾，但隨着有紅色錢莊落實集資計劃，不明朗因素逐步消除，只要成績表有意外驚喜，古勝有信心紅色錢莊可扭轉弱勢，展開新一輪升浪。

芬佬鍾情消費股

北大人今年仍力谷內需以保持經濟的穩定增長，消費股繼續成為芬佬寵兒，古勝則相信賺女人錢容易，相關消費股值得睇高一線。百麗（01880）係祖國最大女裝鞋零售商，並兼營運動服飾銷售業務。百麗在祖國擁有龐大的銷售網絡，分布超過150個主要城市。集團去年上半年純利11.4億元（人仔‧下同），增長14.95%，每股盈利13.47分。期內營業額增加13%至93億元，毛利率微降0.5%至65.4%。鞋類業務的同店銷售按年增7.4%，而運動類業務則下跌7.1%。九月至十月初期間，鞋類同店銷售增9%至10%，運動服亦錄得10%增長。

龍頭地位佔優勢

雖然祖國鞋業跟其他內需企業一樣，面對異常激烈的競爭，但百麗作為業內龍頭，盈利一直保持高增長。百麗上半年資本開支約2億元，主要用作開新店，預計今年鞋類業務新增店舖多達600至700間。大行亦多數睇好百麗，集團下周派成績表，料可成為推動股價上升的催化劑。

古勝