本文重點
福匯亞洲貨幣策略員崔文仲（Ryan）工作時相當認真同投入，私底下亦好玩得，運動、夾Band到繪畫瓣瓣都啱，傾偈講笑時一臉孩子氣，同佢小學畢業時嘅樣好相似。
Ryan嘅媽咪算係一個「潮媽」，閒時會寫Facebook，部分相片更係自己親自掃描。Ryan話細個時媽咪管教好嚴，所以佢都幾聽話，唔會出夜街，仲喺被「半迫」下學咗幾年鋼琴，考獲樂理第5級，直到讀中二時佢覺得練琴實在太悶，走咗去打籃球和踢波而停咗學琴。Ryan一直都鍾意運動，但佢話自從打工後，因為好難湊夠5個人踢波，於是改為玩3人籃球隊，最後連約兩個朋友打波都約唔成，近年就轉為自己一個人打Golf。
北上創業打好根柢
大學畢業後Ryan第一份工就當老闆，北上做生意為內地公司編寫程式，兩年後因經營問題而結束營業回港。做咗兩年老闆，訓練咗朝7晚11嘅工作時間，而且練到講國語，對於佢之後從事外匯工作，可謂大有幫助。
Ryan話今年本港外匯市場競爭的確減少，過去一年公司「人照請、Bonus照出」，未來福匯亞洲會多投放資源喺香港市場，公司剛喬遷至新嘅辦公室，選址喺當眼位置，面對中環行人天橋，路人行過都會留意到。
余絲韻