古人十分注重四時養生，原來今個月五號已經係立夏，即係夏天已經嚟到，雖然天氣仲係時寒時暖，但我哋談養生之道，就要以夏天嚟計算，夏天最重要嘅原來係養心，至於其他留意事項，就同大家分享一下。
立夏時節天氣仲係乍暖還寒，一時熱到死，一時就陰風陣陣，所以一定要注意身體，多帶一件衣服喺身，以防着涼。另外，由於係日長夜短，所以古人建議晚睡早起，但咪以為叫大家三更半夜至去瞓覺，意思係可以稍微延遲至夜晚十一點前，亦由於睡眠時間少咗，所以如果中午可以睡一睡最好，十至廿分鐘就已經足夠。
至於飲食方面，夏天是陽氣漸長，陰氣漸弱，相對五臟嚟講，肝氣漸弱，心力漸強，呢個時候食嘢嘅味道要增酸減苦，補腎助肝，調養胃氣，最好就係食清淡、低脂、易消化嘅食物，少吃肥肉、內臟同埋過鹹嘅嘢，因為會對心臟有所影響。
夏天萬物欣欣向榮，係心神極易受波動嘅季節，所以調養精神方面，要保持冷靜，切忌大喜大怒，同時性功能亦係最敏感衝動嘅時候，性行為要適可而止，切記不可貪多，耗損過度，否則到了秋冬時候，身體內的毛病就會慢慢出現。
夏天氣溫上升，做運動嘅時候亦要特別小心，提防中暑，出外活動時要帶備飲料，及時補充水分。而且咪以為出得汗多就係健康，汗為心之液，要小心自己過度出汗，做完運動後更切忌飲用冰水。另外，接觸陽光要選擇時間，早上十點前和中午四點後係最佳時間。
撰文：小德