政情：肥亨幫誠哥搞石油業務
長和系主席李嘉誠旗下嘅加拿大上市企業赫斯基能源（Husky Energy），尋日宣布委任三名新嘅非執行董事，引起外界關注，事關三人喺政商界均非泛泛之輩，包括有前商務及經濟發展局局長馬時亨、港英年代做過副政治顧問嘅前英國駐港總領事柏聖文，同埋誠哥旗艦公司長江實業嘅老臣子麥理思。肥亨接受我哋越洋訪問話，佢同誠哥原來早喺七十年代已經相識，即係話，今次加盟赫斯基能源，可以話係同誠哥再續商界緣。
赫斯基能源係誠哥手上最值錢嘅資源股，業務涵蓋上中下游嘅勘探生產原油、精煉合成原油同分銷汽油業務，收入佔和黃近三成盈利，被譽為誠哥一生中最偉大嘅投資之一，依家仲計劃將亞洲業務分拆上市，尋日宣布延攬三名猛人加盟，可以話如虎添翼。
獲赫斯基能源任命為非執董嘅三個人，其中柏聖文由○三年到○八年擔任英國駐港總領事，港英年代做過副政治顧問，當年接觸同處理過唔少敏感嘅英國對港政策。而麥理思八○年開始喺長實任職高層，八五年任副主席，○五年退任轉做非執董至今，佢又係和黃非執董，以後則要顧多赫斯基能源一瓣。肥亨嘅任命或者香港傳媒就最感興趣嘞。肥亨○八年離開政府，去年底加盟中策集團做非執行主席，風平浪靜，不過，今次涉及城中「大孖沙」，依家「官商勾結」陰影瀰漫香港政壇，唔知肥亨又點睇？
抱終身學習態度
正身處美國嘅肥亨喺電話中同我哋話，今次係抱住終身學習態度入赫斯基能源，就好似為香港大學擔任經濟金融學院榮譽教授一樣，資源公司佢從未做過，加入赫斯基能源，可以學到更多，而且業務唔喺香港，瓜田李下嘅機會減到最少，情況同出任中策主力進軍台灣保險業務以及做華潤置地非執董業務集中內地相似。
肥亨透露，其實離開官場呢兩年，有好多公司斟佢加盟，但佢已經小心為上，唔熟悉嘅公司一律唔揀，費事踩地雷。肥亨仲講笑咁話，年輕時任職大通銀行時首次見誠哥，當時自己只係G仔一個，七十年代入熊谷組，誠哥係佢哋嘅客戶，畀樓佢哋起，兩人開始有接觸，所以大家相交廿幾年，如果要勾結，都勾結咗好耐啦！
中策收購台灣南山人壽嘅計劃阻力重重，肥亨呢個時候加盟赫斯基能源，難免會惹來揣測，但肥亨斬釘截鐵話，佢同人稱「柯大俠」嘅中策副主席兼行政總裁柯清輝係最佳拍檔，佢唔會離開中策，會繼續同「柯大俠」為收購南山而努力！