日本有好多女僕餐廳，吸引唔少宅男幫襯，估唔到呢股風氣，近年吹到入中國，家陣喺上海就有不少女僕餐廳出現，所有美女侍應都着上傳統嘅女僕裝，當客人推門入嚟時，全部囡囡高八度咁叫：「歡迎主人你回來！」係咪好吸引呢？
本來上海有女僕餐廳，亦唔算乜嘢出奇，因為當中不含色情成分，可以話係間純粹Cosplay嘅餐廳，畀大家飲飲咖啡，聊聊天，但家陣內地，宅男嘅人數亦都唔少，好多都係沉迷動漫同網絡世界，佢哋網友大把，但朋友難求，於是嚟親呢啲餐廳嘅都係單身寡仔，個個冇人傾偈，只係坐喺度眼甘甘望住啲女僕，於是有一間餐廳，乘勢提供「陪聊」服務，等女僕可以同客人傾偈聊天。
而講開「陪聊」，最近有地方政府表示要將佢規範化，形式係讀個課程，然後考試，只要過關就會發出陪聊證，代表你係合資格嘅陪聊員。除咗社工、義工需要攞證外，有網友話全部三陪囡囡都要攞證以提高質素，唔知女僕們又要唔要呢？
老闆話如果呢個制度成熟後，唔排除會安排手下囡囡接受培訓，等佢哋成為合資格嘅陪聊員，但有網友擔心，目前女僕餐廳尚算自律，囡囡只同客人聊天，沒有身體接觸，但日後競爭多咗，慢慢就會轉型，首先囡囡為吸引客人，就會投懷送抱，下一步就會變成「魚蛋檔」為客人提供手足之慾，之後更變為「出火勝地」，再唔係，就會變成另一種「色情髮廊」，大量提供少女出外賣淫。
但亦有網友指出，呢啲係未發生嘅事，唔好杞人憂天，講番目前女僕「陪聊」嘅收費，每小時二十蚊起，再按時段調整，聽落好似好平，但一杯咖啡就要五十蚊，傾三個鐘加兩杯咖啡，未計小姐飲品，埋單就要兩舊，啱唔啱你玩，認真係見仁見智。
撰文：賢