小牛13連勝斷纜
自從獲得「巫師三寶」來投後，達拉斯小牛愈戰愈勇，寫下今季最長13連勝，可惜長路有盡時，小牛尋日喺主場面對弱旅紐約人，竟慘敗94比128，終結近一個月連勝紀錄；同日丹佛金塊大勝孟菲斯灰熊，所以小牛輸波後已跌落西岸第三位，爭奪西岸一哥位現危機。
小牛自由華盛頓巫師換入希活、卡朗畢拿及史堤芬遜後，實力即大增，並由二月中開始連勝13場，但今場突然失準，上半場命中率欠佳下落後10分，第三節更成為全場致命傷，被麥基迪及大衞李爾等人連番得分，其中T-Mac此節回復手感下攻入兩個3分球，完三節後紐約人已將比分帶開25分，而球隊今季曾被小牛恥辱性大炒50分，最後一節冇放軟手腳，最終大勝一仗報回大敗之仇！
金塊炒灰熊爬過小牛
紐約人今場合共六位球員獲得雙位數得分，當中韋遜贊特拿、杜格拉斯、獲加及艾爾夏寧頓都獲「20+」分數，而麥基迪就射入11分。杜格拉斯賽後豪氣表示：「我哋知道對手一定認為紐約人好易應付，一定可以創今季聯盟最長連勝，但就係因為咁激發起球隊嘅鬥心。」
因同日金塊以125比108大勝灰熊，總勝仗追平小牛嘅45勝，但就只輸21場，較小牛少輸一仗，得以搶走西岸二哥位。
另一方面，眾所周知紐約人季後打算招攬勒邦占士及韋迪等巨星，但基於兩人太難爭奪，留隊機會始終較高，所以據《紐約新聞》披露，紐約人已私下同「鷹王」祖莊遜達成初步協議，等待祖莊遜合約到期就正式拉其過檔，而下一個目標就會係灰熊前鋒基爾。
■本報綜合報道