政情：黃永志冒寒影非法賽車 促跟進問題
本港嘅非法賽車問題相當嚴重，中西區區議員黃永志尋日凌晨上載影片，話佢喺薄扶林道拍攝到非法賽車嘅活動，發出一浪接一浪嘅引擎噪音。佢又指過去幾個月，每逢周末或假日區內都會出現非法賽車嘅問題，睡夢中嘅居民屢屢被嘈醒，被迫無奈「觀賞賽事」。
倡裝快相機 加強阻嚇力
黃永志話非法賽車唔單止影響中西區居民，仲有南區以至港島東嘅街坊。佢提到中西區區議會過去一年多次要求政府部門跟進有關問題，情況喺舊年5月曾一度有所收斂，但之後又再故態復萌，甚至愈趨惡劣。雖然區議會方面曾建議執法部門定期喺非法賽車嘅活躍路線架設路障，但當局僅回覆話唔會公開行動細節。佢又建議要裝設俗稱「快相機」嘅偵速攝影機，至少可加強阻嚇力，但當局就只係不斷話會研究喎。
本港過去兩日受寒流侵襲，市區最低氣溫跌到得番個位數字，點解黃永志咁夜仲喺條街度拍攝非法賽車？佢解釋話當晚有街坊走失咗隻狗仔，而佢就同狗主一齊喺街度搵「毛孩」之時就遇上非法賽車。儘管搵到凌晨4點仍蹤迹杳然，但好彩天光之後有其他街坊見到走失嘅狗仔，最終得以同狗主團聚！